أشعار وأزجال بالعامية المصرية
الى أبى وأمى ...
أصل كل أمورى..
فى محاولة لـ" تمصير" بعض "الحواديت" أو المواقف المستوحاة من الكتاب المقدس، بدأت أكتب الجزء الأول من هذا الديوان.. لا لأنى أعترض على الشكل الحالى للكتاب المقدس، ولكن لإحساس دفين ببُعد بعض المعانى عن قلب القارئ المصرى، لصعوبة اللغة الفصحى المستخدمة من جانب، وللبعد التاريخى أو الزمنى عن القارئ اليوم، من جانب آخر، والبعد الجغرافى فى أحيانٍ أخرى، لمترجمى الكتاب بعهديه الى اللغة العربية. واخترت التعبير باللغة العامية المصرية لإيقانى بأنها الأقرب لى ولقلوب معظم المصريين ولأحاسيسهم.. وأردت أيضًا أن أنقل أحداث الحواديت الى مصر بقراها ومدنها وناسها، بلغتهم وثقافتهم مما قد يثير بعض الإعتراض لإختلافها عن الأصل المعتمَد، ولكنى أسجل هنا إبتعادى الكلى عن توثيق أو ترجمة الكتاب، ولكنها رؤية فنية بحتة لمعانيه، خاصة بى وحدى وأردت أن أشارك القارئ بها..
أما عن الجزء الثانى فأدرجت فيه أشعارا ً لى مستوحاة من آيات أو أفكار كتابية، صـَدَّرت بها كل قصيدة، ثم إسترسلت أعبر عن مشاعرى تجاهها أو إحساسى بها أو تصورى عن الخفىّ من معانيها، ولكن من خلال (جوّ مصرى) وبإيقاع موسيقى قابل للتنغيم والغناء.. وقد دفعنى الإحساس ـ أحيانـًا ـ بعيدًا عن المألوف أو الدارج فى الكتابات الروحية، فاعذرونى..
وأخيرًا هى محاولة منى للإبداع والإبتكار، وأترك الحكم لكم فى شأن جدواها من عدمه، ولكنها فى النهاية حالة خاصة جدًا، تعَبِّر عن أحاسيسى الكامنة فى أعماق أعماقى، ولم تكن أبدًا لتنشر، لولا الدفع الرقيق لأصدقاء أثق فى فكرهم وفى مقدار ثقافتهم، طلبوا منى نشرها..
شريف مليكة
(حواديت كتابية)
حدوتة البداية 9
حدوتة المولود 12
حدوتة التجسد 15
حدوتة الست السامريه 19
حدوتة الراجل الأعمى 22
حدوتة الواد إللى مِشى 26
حدوتة الراجل المشلول 35
حدوتة البنت اللى ماتت 41
حدوتة العيان ع البركة 45
حدوتة متى العشار 48
حدوتة لعازر 52
حدوتة باراباس 55
حدوتة الصليب 62
حدوتة البستان 65
حدوتة بطرس 70
الجزء الثانى
(من وحى الكتاب)
حدوتة القيامة 78
مناجاة 81
جواب 84
فزوره 89
الدنيا ساعات 94
التوبة 98
الزمن 102
حدوته عن الخِدمة 105
حدوتة البِت العاميه 108
كلام 115
الخوف 119
إتعجبت 124
عصفور 127
وحدك يا ربى 132
لولا حُبك 136
كُل ما تطلب 141
الجزء الأول
(حواديت كتابية)
فى البدء كان "الكلمة"
خلق الكون كله.. بِكَلمه
خلق النور.. خلق الضلمه
وزرع جنه فى الوادى
وخلقنى أنا شكـْْـله
الخير دا ليك تاكـْْـله
والشر ومشاكـْْـله
ف ثَمَر شجرة النحيادى
عشت أيامى فى سلام
أسمع من فـُُمه كلام
وملايكه تقول أنغام
إسمك قدوس وتنادى
لكن جانى يوم إبليس
وشوشنى بفكر خبيث
إخترته يكون لى ونيس
والنور بقى ضلمه قصادى
قـُُلت: بعرقَك راح تجنى
معرفة الشر.. بتضنى
مش قادر أتوب.. توِّبنى
ح استنى يجينى الفادى
عصفور طاير بيزأزأ
والفجر يدوبك شأشأ
والناس لسه نايمين
مولود جديد بيوأوأ
جنبه حمار بينهَّأ
فى زريبه فى فلسطين
عارفه الناس مش ح تسدأ
بالروح حِبلت بجنين
جه راعى ومعزه تمأمأ
شافوا ملايكه بتبوَأ
بُشرة خير للملايين
وتلاته مجوس م المشرأ
مشيوا ورا نجمه تلألأ
جابوا هدايا وجايين
وبخور.. للكاهن عَبـَّـأ
ودهب.. وانحنوا ساجدين
كان يوسف لسه ملألأ
مريم شرحت له فسدَّأ
وبقوا لتنين فاهمين
دا مَلِك.. موجود مِالمبدأ
ساب عرشُه وجانا يوفـَّـأ
لجل نكون متصالحين
فى مزود إتولد لما راحوالبلد
وجولوا من بعيد يدوَّروا ع الولد
كان ولد عجيب يكلم الكبار
فى الهيكل الرهيب كأنه من الكبار
ومشيوا م البلد لما هيرودس طاح
ورجعوا لما راح وكبر الولد
فى النعمة والجسد
بقى راجل رزين لطيف وديع أمين
راح صام فوق الجبل كام يوم... ييجى أربعين
وبدا يعمل عجايب ويدوَّر ع اللى سايب
مشيوا وراه ألوف المؤمن واللى رايب
وف يوم قالوا الكبار ده ح يولعها نار
أحسن يموت لوحده وتنجا ناس كتار
ع الخشبه مسمروه وبالحربه طعنوه
وهو يصلى ليهم وهُـمَّ يشتموه
ومات اللى كان كل ما يروح مكان
يشفى يطيِّب جراح وبسرعه دفنوه
راحوا إخواته يشوفوه بالطِيب قال يغسلوه
ماشافوش إللا ملاك ويسوع مالقيوه
بشرهم الملاك يسوع رايح هناك
الميت أصله قام ومسيركوا حتلاقوه
وظهر لهم يسوع وفـَهـــِّم الجموع
إنه كسب إليه أولاده إللى نسوه
بدمه محا الخطية وموته كان فديه
لآدم وولاده بعده وقيامته نصر لىَّ
يا ست يا معديه فى الضهر تملِى الميه
مش كنتى م الفجريه جيتى هنا ع البير
ما أنا أصلى مكسوفه ودى حته مكشوفه
ف الصبح معروفه تِشغِى.. وهَمِّى كبير
عطشان أنا ادِّينى م الميه واسقينى
دى أكيد ح تروينى ممنون أكون وأسير
دى ماهيش حاجة عادية أنا واحده سامريه
مش ست يهوديه ليه بتكلمنى كتير؟
لو تعرفى مين أنا لو تشربى منى أنا
ميه تروى بهنا ولا تعطشى لأمشير
إدينى من مَيتك صحيح كده بذمتك
فيه ميه لو دخلتك ماعود أرجع للبير؟
مَيه حَيه من فوق يجعل فى قلبـِك شوق
هاتى جوزِك ييجى يدوق ده أصله أمر خطير
أنا أصْلى .. أصْلى.. مش عارف.. عايشه بالغش
ليه بس تدارى الوش دنا ياما سامحت كتير
روحى وقوللى للناس أنا تبت.. تبت خلاص
لما قابلت مَسِـيَّا ده ما عندُه شَىّ عسير
لله يا محسنين عاجزنظرمسكين
مش من سنه ولاتنين دنا عمرى ماريت نور
مش لجل ذنب جنيت ولا بويا جاب للبيت
فاحش.. ولا حسيت أمى عاشت بفجور
عاوز إيه أديلك ح اطلب وأدعيلك
دعوة تخلى لك الهَّم يبقى سرور
عايز أقول وبخوف
أنا نفسى.. نفسى أشوف
وعارف إنك معروف
بتدوس على كل شرور
راح جايب حته طين وحطها ع العين
إغسل بقى فى العين وراح تكون مبهور
أولها شفت الناس
زى الشجر وخلاص
بعدين جانى إحساس
إنى ح اعدى بحور
شفت ولأول مره
نحله بتمص ف زهره
عصفور واقف على شجره
فرحان أوى وفخور
ورجعت قلت لأهلى قام شيخ طلب وندهلى
قال إيه ده كان من جهلى إنى أشوف النور!!
إنى أروح وأقول إن يسوع "مسحور"
دانا كنت ف عتمه.. ف ليل
وعيشتى كلها ويل
ولولا صبرى طويل
لاكنت جوا قبور
لكنى شفت يسوع وشبعت بعد الجوع
طيب دنا ف إسبوع عشته وكأنه دهور
كان فيه حدانا راجل زين
عنده فلوس ومواشى وطين
.. ومخازن.. خلـِّف ولدين ..
كبّرهم.. وبقوا يساعدوه
وف يوم جه الواد المفعوص
قال له يابويا أنا بدى فلوس
قال له ماتاخد عجل جاموس
وتبيعه فى السوق ياخدوه
قال لأ يابا.. جاموسة إيه!!
أنا أصلى الموضوع وما فيه
حقى من عاليه لواطيه
أنا عايزه.. ونصيبى عِدوه
مالك يابنى إنت اتجنيت؟
عاوز تورث منى البيت..
وأنا فيه؟.. واد زيك مالقيت!!
بالحيا.. عاوز يورث أبوه!!!
قام الواد جه رد وقال
كده بقِلـِّة حَيا وجدال
عيشتى ف بيتك عندى محال
أصل صحابه كانوا وَزوه
فـَرِّت دَمعه من عين أبوه
بَص بسرعه للواد أخوه
خَايف يزعل لو طاوعوه
عايزه يِهديه ويحايلوه
صمم أخونا وخد بزياده
لم هدوه ومشى بـِبَلاده
مر يومين.. شهرين.. ولاعادا
وصحابه برضك رافقوه
خرجوا وقالوا نشوف الدنيا
لفـُّوا مدن وبلاد حاجه تانيه
خلص الزاد تقولشى ف ثانيه
وف لحظه كانوا تركوه
قال أنا أجرب الشغله دى
يوم والتانى نزل ع الوادى
للخنازير يرعى.. قال عادى
بس شويه راحم مشوه
فِضِل الواد بالجوع كام يوم
شاف الخنازير بتاكل دوم
قالك ماكل بدل الصوم
قرب ياخد قاموا رفسوه
وبكا الواد بعد ماضاع أمله
آدى جراير خيبته وعمله
بص لروحه بطينه وعَبَله
قام إشتهى يرجع لأبوه
ومشى الواد فى السكه أيام
فكره يشاغله.. عينـُه ما تنام
عنده أمل يرجع خدام
لو كانوا يرضوا ويقابلوه
عند البيت شافه البواب
جـِرى على طول.. وفتح له الباب
لَمحُه أبوه قام نط وساب
إللى ف ايده ونادى لاخوه
جريوا عليه.. وبالحضن خدوه
وبكوا معاه على حاله.. وواسوه
نادى أبوه لخدمه يحَمُّوه
وعزم الناس ييجوا يهنـُّوه
قام اخوه خد على خاطره وقال
أنا قاعد فى البيت شغال
وابنك ده راح ضيع مال
..أصله كان بيغير من أخوه
.. قال له أبوه الله يخليك
كل ما عندى مسيرى ح اديك
إنما اخوك ده ما كان يرضيك
إننا كنا ما عاد نشوفوه!!
حدوتة الراجل المشلول
يللا نروح على بيت سمعان
دا يسوع رايح أنا سمعان
يللا قوام لنلاقى مكان
وسط الناس دا أكيد يشفيك
بس يا صاحبى إزاى ح نروح
دانا مشلول عاجز مطروح
بارفع راسى بطلوع الروح
مايهمـَّكشى انا راح اودِّيك
أهوجه اخويا.. بلاش تأخير
يللا نشيله قوام ف سرير
بس البرد.. إحنا ف أمشير
حُط الشال ده على رجليك
أنا مش عارف أقول لكو إيه
ده جميل فى القلب حاخـَلـِّيه
حتى اخواتى ماقدروا عليه!!
كفـِّى كلام.. رب يخليك
يادى الزحمه.. شايف العالم
يللا نحاول بقى ونزاحم
لأ كفايه خلاص.. وأنا فاهم..
بس استنانى ح اوَرِّيك
إوعى يابويا.. تعالِى ياوليـَّه
النحيادى.. أو الجهه ديـَّه
بس لقيتها! مافيش غير هيـَّه!!
من فوق السطح ندلـِّيك
بس إزاى راح نطلع فوق؟
نطلب من راجلين بالذوق
إيدكوا معانا.. إرفع فوق..
أيوه خلاص.. يباركلنا فيك!!
وانت يا صاحبى يللا تعالـَى
نعمل بالحبل ده سقاله..
شيلوا السقف هنا يا رجاله..
نزل.. شد شويه عليك!!
أصحابك دول إللى جابوك
أ ُصَـلـَه.. وباين بيحبوك
علشانهم أقول لك مبروك
إنى مسامحك ف اللى جنيت
بس دا باين هنا فيه ناس
عاملين قال للدين حراس!!
وعشان يفهموا مين للخطا داس
قوم بقى وامشى على رجليك
لجل الحب ده اللى أنا شفته
راح أسامحك فى جميع ما غِلُطه
أصل اللى يحب أخوه وخته
عندى أهم من إنى شافيك
حدوتة البنت إللى ماتت
هاح كيلكوا حدوته أصيله
عن إعجاز كان تم ف ليله
بنت بنوت مسكينه عليله
راقده بتتنفس بالتيله
وامها.. آه.. بالحسره مصابه
هى ويايرس جوزها غلابه
رَيـِّس مجمع.. من شافه هابَ
والحُكما كتير والدوا خابَ
راح يسأل عن شىء ممنوع
واحد نجار إسمه يسوع
عند الكهنه مش مبلوع
بيقولوا الأمراض له طوع
قابله وأخده على عنوانه
راح وياه وأخد اخوانه
جُم وقالوا له سيبه مكانه
بنتك ماتت.. جن جنانه
دَخلوا البيت والحزن مخيم
بُكا وعويل والقلب مضلم
قام فهمهم إنه مصمم
يخرجوا ويسيبوها له يتمم
قالوا ماتت قال لأ نايمه
قال قومى راحت قايمه
أكلت بعد ما كت صايمه
والفرحه ف بيتها أهى دايمه
حدوتة العيان ع البـِرْكه
وسط الهيصه والزحمه والعالم
عُمىّ وعُرج وده قاعد وده قايم
كان فيه راجل على فـَرشِتـُُه.. لاهو نايم
ولاقايم.. ما له حد يلاغيه!!
كان بـِأسَى يفكر فى المرهّ الجايه
لما ملاك ييجى يحرك الميه
لو ينزل يشفى مـِيه لمِيه
بس ياعينى عارف ماله حد راميه
والعالم حواليه جايه ورايحه
والدوشه طـَرَشـِته والريحه فايحه
جراح قايحه.. وعيال وكبار نايحه
بقاله سنين يطلب ربنا يشفيه
جاله يسوع سأله: عاوزنى أشفيك؟
قالله أخونا من جهله الله يخليك!!
إبقى إرمينى فى الميه بعد التحريك
بدل ما يطلب.. ويصدقه.. والشفا يدِّيه
حَنّ عليه قلب يسوع قال له قوم
هنا.. دلوقتى.. مش قدامك كام يوم!!
شيل الفرشه قوام.. يكفيك كام سنه نوم!!
ولجل شفاك ما يدوم.. الشر ما ترجع ليه...
حدوتة "متى" اللى شُغْلِتـُه "عشـَّار"
كنت قاعد وحدى يوم
فكرى غرقان فى الهموم
ممكن الحال ده يدوم؟
كل أصحابى فاتونى
فجأه مَرّت ناس كتار
ناس عاديه.. وناس كبار
ومعاهم إبن النجار
جُم علىّ وحوَّطونى
قالوا يسوع شفا المشلول
قلت لا يمكن.. مش معقول!!
قام رايح قايل كده على طول
الليله.. عايزين يزورونى..
قلت أنا مين إنت تجينى
دانا خاطى والذنب مالينى
وسؤالك عنى بيكفينى
قاللى ح أجيلك.. وتعـَشـِّينى!!
جانى يسوع واخواته وياه
قعدوا وأكلوا.. وكلت معاه
قال لى الماضى نسيته .. وإنساه
بس ياريت قلبك تدينى
وعاتبوه الكبار
بقى تاكل مع عشار؟
رد وقال: أنا باختار
الخاطى أشفيه ويجينى
عُمركوا شفتوا طبيب إللى عيان بيسيب..
والدوا له ما يجيب وسليم داوَى؟ دلـُّونى..!!
حدوتة واحد إسمه "لعازر"
مريم ندهت وقالت فينك يا حبيبى تشفيه؟؟
بس أصل يسوع كان بايت ف مكان ما اتعمد فيه
لعازر حبيبنا أهو نام قالها يسوع للى معاه
ساب حاله وراح له قوام وخد التلاميذ وياه
توما قال ده بكره يروق يصبح عفيان لوبات!!
قام قال له يسوع بهدوء لعازر.. حبيبنا.. مات!!
وبكا يسوع لمّا شافوه وقالوا له كده بعتاب
ليه ده حصل سألوه وما رد يسوع بجواب
لما الناس شافوا دموعه قالوا ده كان حبه كبير
ده كل الأرواح بتطيعه وياما شفى مرضى كتير
لو كان هنا من كام يوم كان يشفيه بالتأكيد
بس الميت ح يقوم وح ياخد عمر جديد
بس ف آخر الأيام.. مع موسى.. ومع آدم..
مع داود.. وابرام.. يعنى فى آخر العالم!!
يسوع أخدهم وراح ع القبر بلا أسباب
وهناك طلب تنزاح الحجَرَة من ع الباب
قالوا ده أكيد عفـِّن ده بقاله اربع تيـَّام
بس يسوع ليهم طِمَّن وصَرخ: قوم! راح قام!!
شالوا أكفان من حواليه وجابوا له شويه ميه
بقى بيته مزار بيجيه والناس آمنت بالمِيه!!
حدوتة باراباس
أنا باراباس..
كنت ونا صغيرَّ منداس
مره زمان
كنت جعان
فجأه لقيت واحد غلبان
ماشى ف إيده طبق مليان
قمت خَبَطته
بطوبه قتلته
وأخدت إللى معاه وأكلته
ما اندمتش رغم اللى عملته
أنا باراباس..
إللى مخوف كل الناس
وده خللانى
ماجوع ولا عانى
قبل ماعوز واحتاج ألقانى
أسرق.. أنهب.. أو أقتل تانى
وسط ألوف
بقيت معروف
إسمى بيملا الناس بالخوف
مِنـِّى غير الذل ما ح تشوف
أنا باراباس..
قبضوا علىَّ ف يوم حراس
صبحت سجين..
ف غمضه عين..
ضاع كل اللى بَنيته ف سنين!!
بس أنا ح شكى إزاى؟ ولمين؟
حَكـَموا علىَّ
بموته وحشيه
ح موت مصلوب.. وماليش ديه!!
أنا أستاهل الموته دىَّ...
أنا باراباس..
جُم هتـَفـُولى بكل حماس
فى يوم العيد
ندولى بنشيد
يقولوا إديله عُمر جديد
خلاص ح نسامحه بالتأكيد
وبلا أسباب
إنفتح الباب
وماسمعتش ولو بعتاب
تعالى قدم إلينا حساب
أنا باراباس..
شِرب عنى يسوع الكاس
سأَلت عليه
قالوا تلاقيه
عند "قيافا" بيسألوا فيه
رحت هناك عايز أعرف ليه؟
ليه بيحاكموه؟
وانا اللى سابوه؟
ليه كل شر جنيت نسيوه؟
وبَدَل ماتصلب أنا.. صلبوه؟
أنا باراباس..
ما قدرتش أغلب الإحساس
مين هوَّ؟
كده بقوّه
قِدِر يلمسنى من جوه؟
وليه باشعر له بأبوه؟
شافِتنى عنيه..
شفتنى عنيه!!
خلاص أنا كلى ملك إيديه
ومش ممكن ح افرّط فيه
حدوتة الصليب
لطشه الخدام جرحوه بكلام
وقالولو مدام بتقول تجاديف
إحنا حَكـَمنا تموت قدامنا..
ليك ماظلمنا وبلاش تخاريف!!
الجُرم خطير ح يضل كتير
دَقوه بمسامير طعنوه بالسيف
جرحوه ف جنبه مصلوب جنبه
قال.. إيه ذنبه؟ قالوا: لص سخيف!!
ع الخشبه سابوه يصرخ.. سمعوه
ينده لأبوه بصوت رعدى عنيف
وضلام فى الحال وحصل زلزال
قام واحد قال كان نبى.. يالطيف!
وبُكا وآهات وآلام لساعات
فى الآخر مات وف قبر نطيف
راحم حطوه بقماش غطوه
وحجر زقوه سَدو التجويف
وراحوا له الحد مالقوش ولاحد
والحَجر إنحد قطع التكتيف...
حدوتة البستان
يللا يا مريم .. أيوه يا أمى ..
قومى وهاتى .. الأطياب لمّى ..
يللا بسرعه .. كفاية نَواح ..
قومى قوام .. الفجر أهو لاح ..
يللا نروح.. نفسى أشوف إبنى!!
آه.. دنا حزنى.. بيعزبنى
معقوله؟!.. ده كان لسه معايا
سكاكين بتقطع جوايا..
يللا يا مريم.. إشهلى.. مِدّى
طاب أنا جايه.. إمسكى يَدّى
قرص الشمس يَدوبَك بان
مش ده برضك البستان؟
شايفه يا أمى اللى أنا شايفاه
شامّه الطيب إللى أنا شمَّاه؟
مين بأه زق بقوه الحََجَره
دى أكيد أتقل من كام شجره
أنا مش فاهمه إزاى ده يكون؟
حاجه غريبه.. يكونشى جنون؟
مش كان إبنى هنا مدفون؟
فين طيب جسده ح يكون؟
بُصّى يا مريم شوفى معايا
شايفه؟ ملاك.. مِدى ويايا
سلام.. أنا شُفتــََك؟
أيوه.. أنا جيت لِك
يوم ما الحمل أنا بيه بشَّرتِك
طبعاً أنا فاكراك.. معقوله؟
أنسى اليوم ده؟.. دى مش مقبوله..
بَس.. أنا نفسى ألاقى يسوع..
أصلى تعبت بُكا ودموع
طب مَنا جيتِ لك تانى عشان
أشرح لك.. وليكى إنتِ كمان
إن يسوع قام زى ما قال
وبكِده تمم الأقوال
روحى وقولى لخواته عشان
يعرفوا إن ابن الإنسان
بعدما كان فى القبر أهو قام
زى ما كان فهِّـمكوا تمام
حدوتة بطرس
بعد أن أدرك بطرس أنه قد أنكر المسيح،
وبعد وعوده له بأن لو أنكره الجميع فلن ينكره،
إنتابته أفكار يائسه حتى أنه فكر أن يلحق بيهوذا
الذى كان قد قتل نفسه بعد أن باع المسيح..
(بطرس): أنا مش يهوذا
ده انا سمعان!
يسوع لـَمَحنى
ع الشبكه محنى
قال لى انت صخرة للبنيان..
يهوذا عارضُه
وغمز له غمزه
(يهوذا): ما أنا كنت برضُه
وسط التلامذه
ومشيت وراه
إبن الإنسان..
(بطرس): أنا اللى قلت "إنت المسيح"
وف بيتى داوَى عاجز كسيح
(يهوذا): أنا كان آمِن لى ع الأموال
وبإسمه أصلـِّى يعود الضال
(بطرس): أنا مشيت فوق الأمواج
بس لمَّا البحر هاج
لقيتنى بالعَن مِن غير حساب
يوم المحاكمه.. جنب الباب
ليلتها بكيت
والحزن بـِكى
على اللى جنيت
يا دموعى إسفكى
ولوحدى بقيت
ولمين ح اشتِكى
وشعرت إن مافيش فايدة
ومسيرى للنار القايده
فكَّرت فيك..
يا يهوذا.. وخُفت
إنى أموت.. ومَصيرك شُفت
وبَكيت كمان وبَكيت كتير
ولقيت طريق مفروش حرير
آخره حريق !!
ولقيتنى عايم ف بحور غريق
ولا فيها قايم ولا إيد صديق
ولـَمحْت نـُور جاى من بعيد
داير يدُور بوهَج فريد
ولقيته بيقرَّب ويزيد
وشويه كان
بَلـَع الظلام
وإتمد لى
من وسطـُه إيد
قرَّبت منها أرمى السلام
ومسكت فيها
شدِّتنى ليها
وسمعت صوت
بيقول كلام..
(يسوع): إنت يا بطرس بتحبنى
(بطرس): طبعا ً يا سيِّد
(يسوع): طاب ليه يا بطرس بعِتنى
(بطرس): الخوف يقيِّد
(يسوع): يا بطرس إنت بتحبنى
(بطرس): ومعاك ح اعيِّد
ولقيت يسوع مَسَح الدموع
ولقيتنى طاير فوق الربوع
شاور وقال لى إرعَى الجموع
إرعَى الجموع
إرعَى الجموع
الجزء الثانى
(من وحى الكتاب)
حدوتة القيامة
"وكان نحو الساعة السادسة . فكانت ظلمة على الأرض كلها إلى الساعة التاسعة. واظلمت الشمس وانشق حجاب الهيكل من وسطه" (لوقا 23- 44)
الشمس أهى طالعه تنوَّر
بشويش قـُُرص بيتدوَّر
الليل من طوله إتصوَّر
إنه على طول ح يدوم
قرار:
قـَومنى يارب معاك
أنا قلبى بيترجاك
ترفعنى لفوق لسماك
وأكون أنا.. شمس.. تنوَّر
كان ليها كام يوم مش باينه
هان ع الخَلق.. ومش هاينه
للى خلقها متداينه
فى القبر ينام... وتقوم؟
أما الضلمه فكَت فِرحِت
وزِّت فى قلوبهم.. نَخَسِت
لازم ده يموت.. ومايفلت
ولابد يشيل اللوم..
لكن الخالق كان صمِّم
بقيامته.. ولاده يقوِّم
والشر ده .. زى ما عمِّم
الخير برضك له يوم
مناجاة
"من يشرب من الماء الذى أعطيه أنا فلن يعطش إلى الأبد.."
(يوحنا 4-14)
يا يسوع..
يا اللى بتروى الجموع
من مَيٍّة الينبوع
تعالى.. واروينى
يا حبيب..
إنت دايماً قريب
بس أنا باعند وباسيب
إيدك.. وابعد.. وتغيب
ألقانى وحيد وغريب
على طول.. تنجينى
يا مَلِك..
أنا مهما ح امتلك
ضعفان.. وقوتك
هى إللى تغنينى..
يا رَبى..
خليك دايماً قـُُربى
علـَِّمنى فين دَربى
والبحر.. عدِّينى
يا قـُُدوس..
قَدِّس كـُُل النفوس
يا عريس.. واحنا العروس
بحُبك اسبينى
جواب
"لكلماتى أصغى يا رب. تأمل صراخى. إستمع لصوت دعائى يا ملكى وإلهى لأنى إليك أصلى"
(مزمور 5-1)
بابا الحبيب..
بعد السلام م الدنيا ديَّه
بابعت كلام.. بابعت تحيَّه
فى جواب صُغَيَّر عن شوق يعبَّر
من قلب أخضر ع الحق دوَّر
فى الدنيا داير ينْبِش ويحفـُر
بين العماير.. وسط المقابر..
وانت اللى خابر ميل الضماير..
مين اللى خاسر ومين ح يظفـُر
بابا الحبيب..
ما كنت ناوى
أقول حَكَاوى..
ع الدنيا ح اكتب..
وانا عُمرى ما كدب..
كَلْ الجناح.. مِن طول ما رَفـْرَف
مال الصباح.. ونسيم.. يهـَفهـَف
أعلن وجوب..
لحظه غُروب
ولابد تيجى.. مهما ح نهرب
بابا الحبيب..
طول الطريق.. باطلب رفيق
أو إيد صديق تدينى قُوَّه..
وموج يشيلنى بسمه تشاغِلنى
لكن بَاينِّى.. ساقط ف هُوَّه
وريح قويه تنفُخ شراعى
أفرد قلاعى لكن سواعى
تقلب بنَوَّه
بابا الحبيب..
اللى ح اقول آخر الجواب
كان الأصول أصل الخطاب
إنت الوحيد
طول السنين
فاتح إيدين
مهما أحيد
ويوم السقوط
يوم ما ابقى لوط
يحمينى حِصنَك
أهرب فى حُضنَك
بروح البنوه
فزُّوره..
" لأنه ماذا ينتفع الإنسان لو ربح العالم كله وأهلك نفسه أو خسرها"
(لوقا 9-25)
قرار:
فَكَّر.. تِكسب إيَّاك تحسِب
إن الصُدفه تخليك تِسحَب
ورقه وتِلقى الحل الأنسب
مين ف الدنيا
ينسى ف ثانيه
إنه اتهان؟
مين بيسامح
لو كان رابح
أو خسران؟
مين مبسوط
أكتر من مين؟
المربوط..
فى الدنيا سجين؟
ولاّ الحُر..
ولو كان يسعى
ف عز الحَر..؟
مين فينا للعالم نوَّر؟
اللى اتصوَّر
نفسه أمير..؟
ولاَّ فقير..
يدِّى كتير..
حَب الكُل..
كبير.. وصغيَّر..؟
مين ح يفوز
وح يصبح عِبره؟
قلب عجوز
مليان بالخبرة..
ولاَّ يجوز
أنه يعوز
يرجع طِفل..
الشر ما يدرى؟
مين راح يربح
الملكوت؟
اللى ح يجرح
لو كان يلمح
خاطى يفوت؟
ولاَّ التانى..
مهمَّا يعانى..
ممكن يصفح
حتى الموت؟
الدنيا ساعات بتضيق..
"فى العالم سيكون لكم ضيق ولكن ثقوا أنا قد غلبت العالم"
(يوحنا 16-23)
أنا كنت حزين وطلبتَك
وسط دموع عينى لَمَحتَك
ليه تسمح بالأحزان؟
تِلمس قلب الإنسان
الدنيا ساعات بتضيق
وانت عليك بالتصديق
أنا وحدى غَلبَت العالم
وف يوم أنا ليه مش عارف
حسيتنى لوحدى وخايف..
شاعر إنى وحيد
فى الدنيا شريد..
الدنيا ساعات بتضيق
وانت عليك بالتصديق
أنا وحدى غَلبَت العالم
المَرض أهو نادى علىَّ
والنوم ماتشوفه عينىَّ
أنا ليك صليت
بعدما كَلِّيت
الدنيا ساعات بتضيق
وانت عليك بالتصديق
أنا وحدى غَلبَت العالم
وساعات الروح تتفاخر
مكر الشرير ماله آخر
ح اسمع على طول
صوتك بيقول
الدنيا ساعات بتضيق
وانت عليك بالتصديق
أنا وحدى غَلبَت العالم
وحروب تقتل فى شعوب
أمراض، أوبئه، وكروب
قلبى بيخاف..
من كُتر ماشاف
الدنيا ساعات بتضيق
وانت عليك بالتصديق
أنا وحدى غَلبَت العالم
التــــوبــــه
"فاصنعوا أثماراً تليق بالتوبة"
لوقا 3-8
التوبه هى الباب منه تعَدِّى الألباب
من حزن وكآبه للراحه.. بعد عذاب
قرار:
إرجع يا خاطى وتوب
ده الرب رب قلوب
مستنى ترجع له
مهما مشيت فى دروب
التوبه هى النور فى طريق ضلام مهجور
لو ينطفى وَهَجُه نبقى ف مكاننا ندور
التوبه دى الكَوَّه على مركبه ف نوَّه
مِنها يبان ضعفى لو كُنت مش جُوَّه
التوبه دى المفتاح لِقيُه أخونا وصاح
الكنز ف الصندوق مِلْكى! وفَرَجُه أهو لاح
التوبه للإنسان لُقمه تِسِدْ جَعان
ضِلِّه شجر وارف ومَيَّه للعطشان
التوبه تِهدِينى مهما ضاعوا سنينى
ومهما اكون عطشان دمعى ح يروينى
شعب السما بيفرح وملايكته تصَدَّح
لو تاب هنا خاطى باب قلبه لو يفتح
التوبه هى رجوع هى الصلاه بخشوع
لو صادقه تِسبينى هى نَدَم ودموع
التوبة هى قرار هى طَريق باختار
الشر مارجع له بالجهد والإصرار
الزمن..
تيك.. تاك.. تيك.. تاك
الساعه كام ويَّاك؟
فاكر الزَمن ينساك؟
تيك.. تاك.. تيك.. تاك
لو باب تِسِد وراك
ح يخش م الشباك
تيك.. تاك.. تيك.. تاك
زعلان من اللى أزاك
وبكلمه قاسيه ناداك
تيك.. تاك.. تيك.. تاك
إرمِى الكلام ده وراك
تِلقَى الزمن نسَّاك
تيك.. تاك.. تيك.. تاك
واللى فى يوم بكَّاك
يوم تانى.. فرحَه سقاك
تيك.. تاك.. تيك.. تاك
ها تخَلَّص إللى وراك؟
بعدين تلاقى هـَنـَاك؟
تيك.. تاك.. تيك.. تاك
وهاتعمل إيه لوجاك
الموت وماستناك
تيك.. تاك.. تيك.. تاك
تيك.. تاك..
حدوته عن الخدمة
"ملوك الأمم يسودونهم والمتسلطون عليهم يُدعَون محسنين وأما أنتُم فليس هكذا بل الكبير فيكم ليكن كالأصغر. والمتقدم كالخادم."
لوقا 22: 25-26
يا قداستَك.. يا فخامتَك
إتكعِبلت؟.. سلامتَك
يمكن تُقل عمامتك
لبَخَك؟ ولاّ ظلمتك؟
بُص يسوع وبساطته
إتندّروا بوداعته
خالق الكون بعظمته
إختار.. ف زريبه ولادته
إنزل من فوق عرشـَـك
ها تضيع! لو إبليس غَشّك
إنهض.. قوم من فرشك
قبل ما ييجوا بنعشك!
صلى عشانى ف أسهارك
فتش عنى فى نهارك
إلهب فتورى بنارك
ده يسوع للخدمه اختارك
الخدمه من "الخَدام"
يقعد ورا مش قدام
لجل حبيبه ما ينام
عملى مش بس كلام
حدوتة البت العاميه
(من القصص الشعبية)
شىء لله يا عادرا
شىء لله يا توماس
بصلاتِك للشفا قادره
وهاروح وهاقول للناس
البت سناء كـَت ماره
جنب كنيسه فى بلدهم
مش شايفه شىء بالمره
ماهى م الى فَقَدوا بصرهم
شىء لله يا عادرا
شىء لله يا توماس
بصلاتِك للشفا قادره
وهاروح وهاقول للناس
كت راحت للدكتور
وقال تلزم عمليه
خافت لتعدى شهور
وتفضل زى ما هىَّ
شىء لله يا عادرا
شىء لله يا توماس
بصلاتِك للشفا قادره
وهاروح وهاقول للناس
وف ليله كانت نايمه
شافت العدرا لابسه أبيض
قالت لها هاصْبَح صايمه
لو بس يسوع يتمجد
شىء لله يا عادرا
شىء لله يا توماس
بصلاتِك للشفا قادره
وهاروح وهاقول للناس
كان جنبها راجل واقف
قالت دا الأنبا توماس
للى ها يحصل كان عارف
وف إيده صليب ينباس
شىء لله يا عادرا
شىء لله يا توماس
بصلاتِك للشفا قادره
وهاروح وهاقول للناس
صَلـِّت مريم ع المَيَّه
إللى ف قـُـلـَّه محطوطه
بعدين عَمَلِت عمليه
صَبَحِت عينها مربوطه
شىء لله يا عادرا
شىء لله يا توماس
بصلاتِك للشفا قادره
وهاروح وهاقول للناس
وبعد أربع تيام
شالت العدرا الشاش
عاشِت بعدها فى سلام
وضلام عِينيها إنحاش
شىء لله يا عادرا
شىء لله يا توماس
بصلاتِك للشفا قادره
وهاروح وهاقول للناس
كلام..
"هذا الشعب يكرمنى بشفتيه وأما قلبه
فمبتعد عنى بعيداً. وباطلاً يعبدوننى
وهم يعلِّمون تعاليم هى وصايا الناس"
مرقس 7: 6-7
كلام.. كلام.. كلام..
بحبك يارب.. كلام
لما الدنيا تضحك لى
باعيش ويّاك فى سلام
وف لحظه أبعد.. ده كلام؟
يوم ما اشعُر بيك بتقول لى
ح تشيل وياىَ آلام؟
ونا عينى ع الملكوت
وياعينى ع الملكوت!
فيه عرش الله.. محطوط
مش زى قصورنا الفانيه
لكنى نسيت عين تانيه
تِنهل من مُتع الدنيا
وتقول.. بُكره.. ح نموت!
بَاهوى الآغى الستات
وأسحِر بكلامى بنات
وأشرب خمر العِنبات
أرقُص لوعينى تشوف
واحده دراعها مكشوف
وأقول لضميرى .. بكسوف
ده يسوع.. عشان كده .. مات!
كلام فاضى.. ومليان
أنا أقول راضى.. علشان
لا فى مِلك ولا أطيان
تشغلنى ع الخالِق
ولا أحبش أتعايِق
بس اصْـلى مش رايِق
فى الدنيا.. أنا غرقان!!
الخوف..
"سلاماً أترك لكم.. سلامى أعطيكم ليس كما يعطى العالم أعطيكم أنا. لا تضطرب قلوبكم. ولا ترهب."
يوحنا 14:27
الخوف بيحوم.. بيزوم.. وبخاف
أنا مش وحدى
ده برضُه الأسلاف
من قبلنا قالوا.. سِلِم مِن خاف
وده شاب شعره..
من كـُُتر ما شاف!
قرار: مين غيرك الخوف ها يهدِّى
توعِدنى بسلام وبتدِّى
ويوم ما ابعِد
ومهما اعنِد
ترجعنى وسلامك تِهدى
خايف على عُمرى.. بيجرى قوام
وانا باجرى وراه.. وبدارى آلام
الضهر إنحنى..
والشيبه وسام!
راحت كام سنه..
وح يفضل كام!
خايف أتلفِّت ما ألاقى ونيس..
شخص اتلاقى وياه بأحاسيس..
الحب جَمعْنا
مالوش معنى
لوح يفرقنا.. حسد إبليس
خايف م العتمه.. وم التعتيم..
بلا نور سِيَّان.. جاهل وحكيم..
لتنين خايفين..
والخوف تلجيم..
فى الضلمه الكلمه.. ما تِلقى نديم!
خايف لا يقولوا علىَّ.. جبان
وبخاف.. م الضلمه.. و م الغربان
أمشى أدبدب..
وأعمل هيَّاجان..
الناس تِحسبنى من الشجعان!
الخوف ما بيعرفشى يفرق..
بين عيِّل..
خاف لو ابوه بَرَّق
وأبوه..
لو بَّطل يسترزَق
والجد..
لا شبَح الموت يِزهَق
ويدور الخوف
ع الدنيا يطوف
يسرق فى أمان.. وطمان ما نشوف
وبيسبى أُلوف..
بخَطَر محفوف..
وح نهرب فين من وِش الخوف!
إتعَجِبْت..!!
"فأخذوا سعوف النخل وخرجوا للقائه
وكانوا يصرخون أوصنا مبارك الآتى
بإسم الرب مَلِك إسرائيل. ووجد يسوع
جحشاً فجلس عليه.."
يوحنا 12: 13-14
إتعجبت لحالى.. وحالَك
يوم ما طَلَبت.. الرب ادالَك
بعدما تاخد.. ويروق بالَك
تنسى.. وتعمل إلى بَدى لَك
إتعجبت من اللى شافوه
راكب جحش.. مَلِك نصبوه!
يوم والتانى.. ف لحظه باعوه!
تاج المُلكْ.. بشوك بَدَلوه!
وإتعجبت كمان وكمان
لمَّا سمعت إبن الإنسان
فوق الخَشَبه.. بكل حنان
يطلب للقَتَله.. الغفران
وإتعجبت.. لمَّا نادانى..
وسط الدَوْشه.. صوت ف ودانى
مهما بعِدْت.. ح ترجع تانى
مستنيك.. وفاتح أحْضانى
عصفور..
"هؤلاء هم الذين أتوا من الضيقة العظيمة وقد غسلوا ثيابهم وبيضوا ثيابهم فى دم الخروف"
رؤيا يوحنا 7-14
عصفور.. مقهور
وقواه بِتخُور
نِفسُه يرَفرَف
ويطير لبعيد..
دَمُعه يكفكف..
الحِمل شديد..
بارِك فوقُه
تارِك عَلامات..
تجاعيد.. ندبات..
فَضَحِت سِنُّه..
وبرجلُه يَرفـَّص
والجسم يفلفَصْ
ويحاول إنُّه
يفلت مِنُّه
ويمِد ويفرِد جناحاته
مربوطه.. مشحوطه..
وسمعنا آهاته..
وبعَزْم يقطَّع رباطاته..
ويقول هانِت..
ويقول دانِت..
قَرَّبت أطير!
فوق نسمه حرير..
تِرفعنى لفُوق..
يملانى الشوق..
والقلب ح يزهَى بدقاته
ويقول يانى..
والكون راح يسكُت وسكاته
يملى ودانى..
والعصفور يفرد جناحاته
ويطير تانى..
وما ح اسمع غير دَقِّه قلبى
ولاَّ دى دقَّه قَلب الكون؟
. . .. . .
أصوات وغُنا.. ومافيش جنبى
غير نور.. وسرور.. وبحور بَنور..
ولَمحت طيور.. مليانه عيون..
ع العرش تدور..
حوالين ربى..
ومَلانى النور..
وصبحت أنا نور..
وباطير سواح..
بلا ريش وجناح...
. . .
وَحدك يا ربى
"من يشرب من هذا الماء يعطش أيضًا.." يوحنا 4-13
وشارب مياه الحياه.. وظمآن..
واميِّل كمان.. وأشرب كمان..
دى مالحه.. ما تروى
ف جوفى.. بتكوى..
وأطلع جبال.. واطوف وديان
وادوَّر.. واخبَّط.. وافتـَّح ببان
وأشرب.. وأشرب..
ولازم أجرَّب..
واميِّل كمان.. وأشرب كمان
وأصرُخ واقول.. لسه انا عطشان
قرار:
وحدَك ياربى.. إنت القوى
من ميِّتك.. أنا بارتوى
يمينك بتدى
تشدد سواعدى
وتِملى سفينتى
مجايب.. عجايب!
وكُل المصاعب
تحت جناحاتك
راح تِنطُوى
وعارف انى خايف.. من هبوب الرياح
وحالف ماشايف.. بُكره شمس الصباح
غير لمَّا اصيد
ورزقى يفيض..
شراعى يبحَّر.. ويبعد بعيد
سواعدى حديد.. وقلبى عنيد
وأبعد هناك
وأرمى الشِباك
تضيع الساعات ف الصياح والنواح
شباكى ليه فاضيه؟ بعد كُل الكفاح!!
لولا حُبَّك
"ولكن الله بين محبته لنا لأنه ونحن بعد خطاة مات المسيح لأجلنا"
(رومية 5-8)
لولا حُبَّك..
أنا كنت ضايع
وسط البحور
والموج باصارع
جُوّا الجحور
إيه المِخَبِّى؟
وتلوح قبور..
ويدق قلبى..
لولا حُبَّك..
ما كنت أحبْ
إللى بيكره
واللى يسِبْ
واخاف لا بُكره
تطاردنى ذِكرى
تحاربنى فِكره
ورياح تَهبْ
لولا حُبَّك..
مالوش حدود
ما كُنت تِقْبل
خاطى يعود
ومهما يعمل
وضلام يَسود
بالحب تغسل
وبخير تجُود
لولا حُبَّك..
غَّطى الجِراحْ
ما كان يكفِّى
حُزن ونواحْ
وغضب ما يشفى
على حُب راحْ
وصديق ما يوفى
بالسِر باحْ..
لولا حُبَّك..
حُبَّك عجيب
تِرضى بدائى
وانت الطبيب
ويكون دوائى
دم الحبيب
والموت تدوقه
فوق الصليب..
كُل ما تطلب..
"الحق الحق أقول لكم إنكم ستبكون وتنوحون والعالم يفرح. أنتم ستحزنون ولكن حزنكم يتحوَّل إلى فرح.
المرأة وهى تلد تحزن لأن ساعتها قد جاءت. ولكن متى ولدت الطفل لا تعود تذكر الشدَّة لسبب الفرح لأنه
قد ولد إنسان فى العالم. فأنتم كذلك عندكم الآن حزن. ولكنى سأراكم أيضا فتفرح قلوبكم ولا ينزع أحد فرحكم منكم. وفى ذلك اليوم لا تسألوننى شيئاً. الحق الحق أقول لكم إن كل ما طلبتم من الآب باسمى يعطيكم."
يوحنا 16: 20-23
إنت بتحزن وتنـوح
والناس ف الدنيا بتفرح
لو تيجى لابوك وتبُوح
حُزنك م القلب ح يمسح
كل ما تطلب ح يكون
جرب كده واطلب باسمه
ح تلاقى قلبك مسكون
بالفرحه من روح قُدسه
الأم وهى بتولد
تبقى حزينه وتتألم
بس شويه وراح تسعد
لمَّا تعبها ح تمم
كل ما تطلب ح يكون
جرب كده واطلب باسمه
ح تلاقى قلبك مسكون
بالفرحه من روح قُدسه
رَغم الحزن والضيقه
اللى مالى قلبك صَلِّى
ويسوع ح يلاقى طريقه
يملاك فرحه ويخللى
كل ما تطلب ح يكون
جرب كده واطلب باسمه
ح تلاقى قلبك مسكون
بالفرحه من روح قُدسه
